‘మైసా’ కోసం రంగంలోకి రష్మిక.. కేరళలో హై వోల్టేజ్ యాక్షన్ షెడ్యూల్!

నేషనల్ క్రష్ రష్మిక మందన్న ప్రధాన పాత్రలో నటిస్తున్న యాక్షన్ థ్రిల్లర్ 'మైసా'. రవీంద్ర పుల్లె దర్శకత్వంలో తెరకెక్కుతున్న ఈ సినిమా షూటింగ్ శరవేగంగా జరుగుతోంది. తాజాగా ఈ చిత్ర యూనిట్ కేరళలో కీలకమైన 15 రోజుల యాక్షన్ షెడ్యూల్‌ను ప్రారంభించింది. ఈ షెడ్యూల్‌లో రష్మికపై హై వోల్టేజ్ యాక్షన్ సన్నివేశాలను చిత్రీకరించనున్నారు.

ఈ సినిమాలోని యాక్షన్ ఘట్టాల కోసం రష్మిక తీవ్రంగా శ్రమించారు. థాయ్‌లాండ్‌లోని బ్యాంకాక్‌లో ప్రత్యేకంగా స్టంట్ అండ్ కంబాట్ బూట్‌క్యాంప్‌లో పాల్గొన్నారు. ఆమె అక్కడ రోజుకు ఎనిమిది గంటల పాటు కఠిన శిక్షణ తీసుకున్నారు. చేతులతో పోరాటం, అధునాతన స్టంట్ టెక్నిక్స్ వంటివి నేర్చుకున్నారు. ఈ శిక్షణ తర్వాతే ఆమె కేరళ షెడ్యూల్‌లో జాయిన్ అయ్యారు.

ఈ చిత్రంలో రష్మిక ఒక గోండు తెగకు చెందిన యువతి పాత్రలో కనిపించనున్నారు. శారీరక దృఢత్వంతో పాటు భావోద్వేగాలను కూడా పండించాల్సిన పాత్ర ఇది. భారతీయ సినిమాలో మహిళా ప్రధాన యాక్షన్ చిత్రాలకు కొత్త బెంచ్‌మార్క్‌ను సెట్ చేసేలా ఈ సినిమాను తీర్చిదిద్దుతున్నట్లు చిత్ర బృందం చెబుతోంది.

స్టంట్ మాస్టర్ కెచా కంపాక్డీ యాక్షన్ కొరియోగ్రఫీ అందిస్తుండగా, అంతర్జాతీయ యాక్షన్ డైరెక్టర్ ఆండీ లాంగ్ ఈ స్టంట్స్‌ను పర్యవేక్షిస్తున్నారు. ఈ చిత్రంలో ఈశ్వరీ రావు, గురు సోమసుందరం, రావు రమేష్ కీలక పాత్రలు పోషిస్తున్నారు. శ్రేయాస్ పి కృష్ణ సినిమాటోగ్రఫీ, జేక్స్ బిజోయ్ సంగీతం అందిస్తున్నారు.